عارفين ورق الجلاد اللى بيتباع عند بتوع لوازم الديكور دا بيبقى فيه لزق منو فيه و بيلمع و سهل التنضيف
حماتى جبتلى منى كام متر كده فشغلت الفكيره و قلت استغلهم فى تزيين البيت و قلت لازم انتو كمان تعرفو عشان انتو حبيايبى
نبدأ
اولا:المطبخ
1/ماما كانت جيبالى الشيف الجبس اللى بيتحط جواه المعالق الخشب على رخامه المطبخ و كان جاى معاه معلقتين ملهومش اى لازمه فروحت قصيت الجلاد ده و غلفت بيه المعالق و جبت ورد روز عشان انا مطبخى روز و الجلاد كان ابيض و فيه خطوط زى شكل الرخام رمادى المهم جبت الورود دول من عند بتاع الخردوات و لزقتهم على المعالق و علقت المعالق فى المطبخ بقو شكلهم حلو
2/انا حطه الثلاجه قريب من الحوض و كل لما اغسل المواعين القى فى على جنب الثلاجه طرطشه ميه روحت جره الثلاجه و لزقت الجلاد ده عليها منه جدد الشكل و منه حماها من الصدا
3/كمان البوتجاز جمب الحيطه عشان المبخ بتاعى ضيق و كل لما اقلى بطاطس الزيت يغرق الحيطه و اقعد امسح روحت ملزقه الجلاد عشان هو سهل المسح و لما لونه يصفر اوى هخلعه و ارميه
4/انا دواليب المطبخ اللى تحت عندى جرار و ديما التراب و بواقى الاكل بتلزق فى المجرى بتاع الجرار و كل لما اندفها بالسلكه الالوميتال يتجرح روحت قصيت الجلاد على قد المجرى و لزقته عشان لما يتوسخ اشيله بسهوله و ارميه
ثانيا:الحمام
1/مراية الحمام فى حته فيها لونها اغمق روحت قصيت الجلاد و عملت بيه اطار للمرايه و لزقت بعليه بمسدس الشمع ورد زى اللى لزقته على المعالق عشان حمامى كمان روز
2/عندى دولاب الوميتال فى الحمام بخزن فيه الفوط و الصابون و الشامبو روحت قصيت الجلاد على شكل قلوب و لزقتها عاى الورلاب و زينتهم بالورد الروز
ثالثا:حجرة النوم 
جبت جلاد لونه احمر و قصيته على شكل قلوب و قلبين لزقين فى بعض و قلوب مفرغه و لزقتهم حولين البرواز اللى فيه صور فرحى و قصيت قلب طالع منه سهمين و اول حرف من اسمى و اسم زوجى و لزقتهم جمب بعض و عملت قلبين لزقين فى بعض و لزقتهم على مرايه السراحه من فوق
رابعا:الصاله
انا عندى صاله توزيع صغيره حطه فى جنب فيها برواز روحت جايبه ورق جلاد بنى و قصيت دواير و مربعات كبيره و صغيره و اتنين جوه بعض م حبه مفرغين و لزقتهم حولين البرواز فبان كأنه ورق حائط
اخيرا:الانتريه
الكومبو اللى بيتحط عليه التليفزيون حته خشب منه وقعت روحت جبت جلاد نفس لون الخشب و قطعتها اد الرفوف و غلفت بيها الكومبو كله و بان كأنه لسه جديد
ياريت تجربو الافكار دى و تدعولى بالذريه الصالحه و ان شاء الله هصورلكم كل الحجات دى و انزلهلكم
اوعوووووووووووووووووووووووووووووووو تنسوا التقييم
افكار حلوة بس كانت هتبقى احلى بالصور
