سر ده عرفته بعد مجهود جامد قوى قوى قوى
المكونات دى لكيلو لحمه و يقاس عليها عند زيادة الكمية
1- اللحمه تكون مفرومه فرم خشن مش ناعم
2- يضاف 20% دهن بتلو (من عند الجزار أسمه نطر)
3- تتبل الكفته بملح و فلفل و بشر بصله متوسطه مصفاه تماما من المياه لإننا هانحتاج الميهعند الشوى يعنى احتفظى بيها
4- معلقتين برغل ينقعوا فى ماء لمده ساعه ثم يصفوا من الماء تمام و يتم فرمهم مع اللحم والبصل(موضوع البرغل انا ضيفته من عندى لأن الحاتى مش بيحط برغل لكن السبب فى انى ضيفت البرغل أن طريقه تصبيع الكفته و شويها بدون ماتقع عايزه حرفيه عاليه قوى علشان)
كده ضيفت البرغل إختيارى للناس اللى ماعندهاش خبره الشوى علشان أضمن أنها ماتقعش منهم على الفحم
5- يقسم الكيلو على حسب عدد الأسياخ على هيئة كرات و يوضع فى الثلاجه لمده 3 ساعات
6- ضعى فى طبق او صينيه مياه البصل و عليها معلقه بيكربونات صوديوم (بيكينج باودر)
طبعا فى ماده تانيه بتستخدم لكن صعب تلاقيها عند أى عطار عموما هاقول عليها اللى يقدر
يجيبها يحطها بدل البيكربونات اسمها (عطرون) و هى على شكل الملح الخشن و يتم تذويبها
فى ماء و تصفيتها من الشوائب و طبعا يفضل إذابتها فى ماء البصل
7- طلعى الكفته من التلاجه قبل الشوى على طول و تمسكى قطعه الكفته على ايدك و تحطى السيخ عليها من المنتصف و تضغطى اللحمه عليها و تبدى تفرديها على السيخ بالضغط المتواصل لفوق و تحت لحد ماتتفرد على السيخ بالسمك المناسب ماتبقاش تخينه قوى و لا رفيعه و الأهم بعد ماتفرديها بللى ايدك بميه البصل اللى عليها كربونات او عطرون واضغطى على مسافات متباعده بصوابعك علشان تعملى فروق فى السيخ ماتبقاش الكتله كلها حته واحده ده بيقلل من وزن الكفته على السيخ و ماتقعش
ملحوظه:فايده البيكربونات أو العطرون انه بيخلى اللحمه تتماسك بسرعه اول ماتشم النار .
– بعد ماتشيلى السيخ اللى استوى ضعيه فى صينيه مفروشه بالعيش وبقدونس متقطع وغطيها و حطيها فى فرن البوتجاز و اقفلى عليه حتى لا تبرد الكفته الى ان تخلصى المقدار كله
أحلى كفته ممكن تاكليها فى البيت
بل أفضل فى الطعم و طبعا ده على حسب نوع اللحم
طبعا فى حاجه تانيه بتتحط على الكفته اللى بتخلى الناس ماتقبلش طعم اى كفته غير من المحلات
الماده دى هى محسن طعم أسمها مونوصوديوم أو ملح صينى تشبه السكر فى شكلها و موجوده
فى الهايبرات الكبيره زى كارفور مثلا الكيلو ب 20 جنيه و طبعا ده يفضل عندك سنه و اكتر
لأنك بتحطى معلقتين صغيرتين بس على الكيلو منه
لا احد يعرف السر ده غير صنايعية الكباب و الكفته فقط
منقووووووووول
بس خدي بالك الملح الصيني بيعمل سرطنات
إن شاء الله أجربها
أنا بعمل كفتة الحاتى بطريقة الشيف شربينى وبتطلع ممتازة
