الوسم: الغضبان

فكرة سهلة وبسيطة ممكن نعمل بيها شخصيات للحواديات لاولادنا الصغار وعن تجربة ها ينبسطوا بيها كتيير..

كل المطلوب اننا نجيب ورق كارتون ونرسم علية وجوة شخصيات الحدوتة ونقصة و نقطع شريط من الكرتون نلصقة اسفلها علشان نمسك منة الشخصية وندارى خلف اى شىء مناسب ونحكى لهم الحدوتة ..

وتعالو نحكى الحدوتة بالشخصيات الى صنعتها بخامات بسيطة جدا..

حدوتة الأرنب الغضبان (اخدناها زمان فى المدرسة )…

كان يا ما كان ارنب صغير صحى من النوم وطلب من مامتة الفطار..

مامتة جابتلة خس وجزر ..

الارنب غضب وقال فى الفطار خس وجزر وفى الغدا خس وجزر وفى العشا خس وجزر انا عاوز اكل حاجة تانية..

مامتة قالتلة هو دة اكل الارانب وهو دة الموجود عندى..

خرج الارنب من بيتة غضبان يدور على حاجة جديدة ياكلها..

قابلتة القطة وقدمتلة كوب لبن..

لكن الارنب ما عرفش يشرب اللبن شكرها ومشى شوية لغاية ما قابل الكلب اللى ادالة عضمة كبيرة..

لكن ما عرفش ياكلها شكرة ومشى شوية وهو تعبان وجعان لغاية ما قابل البطة وهى بتعوم فى المية جابتلة سمكة لذيذة…

لكن الارنب ما عرفش ياكلها وعرف انة غلطان وان كل واحد لة اكلة ولازم يرضى باللى ربنا رزقة بية ..

رجع لمامتة واعتذر لها واكل الخس والجزر وهو فرحان .

وتوتة توتة خلصت الحدوتة حلوة ولا ملتوتة..

يارب تكون عجبتكم فكرتى المتواضعة ..