حبيباتى اللى عندها مشكلة فى جفاف جلد القدم سواء من الكعب او الاصابع او حتى بطن القدم معايا ان شاء الله هتنسيه
يلا ورايا هنعمل خلطة سحرية للتخلص من جفاف الاماكن اللى ذكرتها بالقدم
زبدة شفايف (كاكاو)
جلسرين
كريم مرطب علبة كاملة(جليسوليد الاحمر او نيفيا الازرق الدهنى مش السوفت او اى كريم دهنى )
بيتاديرم بتاع تسلخات الاطفال
اكياس بلاستيك شفافة
طبعا هننسي حاجة اسمها حجر خفاف تماما او الة ازالة قشور الرجل
احنا هنعالج مش هنعمل بديكير
طبعا كلكم بتسالو زبدة شفايف لية ؟؟؟؟
هقولك ياستى ليه علشان تعوض المنطقة دى بزيوت نقصاها وتمنع الجفاف اللى مدمرها
طب وكله كوم وحكاية كريم البيتاديرم دا بتاع الاطفال هى رجلينا عندها تسلخ؟؟؟؟
كريم بيتاديرم فيه مواد مغذية بتشفى وتعالج الجفاف والتشقق زى السحر ومافيش منها اى اضرار
نخلط المكونات كلها على بعضها لغاية ما تتجانس كويس
كل يوم زى الشطورة كدا وانتى قاعدة على النت او بتتفرجى على التليفزيون تخدى من المرطب دا وتدهنى رجليكى كويس حتى باطن القدم وتلبسي الكيس المحترم الشفاف وتقفليه بأى طريقة انا بقفله للزبونات عندى باستك واعرضه للبخار الخفيف على ما اخلص شعرها او مكياجها تكون بقت ناعمة
انتى بقى تلبسي شراب لان اكيد ما عندكيش جهاز بخار
وتسيبيها من ساعة لاتنين بعدها زى الشطورة الامورة تتفرجى على جمال رجليكى ونعومتها
اضمن لك رجليكى مهما كنت متشققة هترجع زى رجل البيبى فى اسبوع
وماتنسوش الضريبة ماهو مافيش حاجة بالساهل
ادعولى ربنا ييسر لى امرى ويرزقنى من حيث لا احتسب
بجد توبيك جميل وافادنا جدا
|
تسلميلى حبيبتى وماانحرم من طلتك ابدا
جزاكى الله ألف خير والجنة يارب ..
|
تسلميلي وربنا يبارك لك على الدعوات الحلوة دى