سميها زى ماتسميها .. قراقيش بالعجوة .. كعب غزال..المهم ان طعمها خيال
السلام عليكم ورحمة الله وبركاته
النهاردة جايبالكم قراقيش بالعجوة انما طعمها جميل والحقيقة دى اول مرة اجربها ف مجاش فى بالى اصور من الاول بس صورت النتيجة النهائية لما عجبتنى
واااااااااااااااادى النتيجة
[IMG]https://files2.*******.com/2019/10/13515511806985.jpg[/IMG]
اقولكم بقى ع المقادير
والكوب المستخدم هو كوب الشاى المج الزجاج
المقادير :
1 ك دقيق
كوب وربع سمن بلدى
34 كوب زيت
2 ملعقة خميرة كبيرة
كيس بيكنج باودر
فانيليا
4 ملاعق سكر كبيرة
ملعقة صغيرة ملح
نصف ك سمسم
بيضة
ولبن دافى حسب الحاجة تقريبا كوب ونصف
الطريقة :
1.نحط الخميرة ومعلقة سكر ونخمرهم بماية دافية
2.نسخن السمن والزيت
3.نحط الدقيق والبيكنج باودر والملح مع بعض
4.نعمل حفرة فى الدقيق ونحط فيها السمسم طبعا بعد مانحمره بملعقة زيت حتى يصفر لونه
5.نحط السمن والزيت فوق السمسم ونقلب بمعلقة خشب لحد ما الدقيق يتشرب
6.نحط الخميرة ونعجن
7.ندفى اللبن ع النار ونحط معاه باقى السكر والفانيليا ونعجن بيه لحد مالعجينة تبقى حلوة وطرية
8.نسيب العجين يخمر لحد مانحضر الحشو
الحشو :
نصف ك عجوة
معلقة سمن بلدى
قليل من الماء الساخن
شوية سمسم
ومعلقة حبة البركة
نفرم العجوة ونحط الماية الدافية والسمن فى الكبة عشان تمشى وتلف لحد ما العجوة تبقى طرية ومفرومة كويس
هانفرد العجين بسمك نصف سم ونفرد العجوة بالمعلقة ونلفها رول ونقطع وندهنها ببيض معاه شوية لبن وفانيليا وممكن شوية قهوة يدوها لون حلو
نرصها فى صينية وننسيبها تخمر ساعة او اكتر حسب الجو
تخبز فى فرن 200 لحد ماتحمر من تحت ونولع الشواية تحمر الوش
وده شكلها بعد ما طلعت
[IMG]https://files2.*******.com/2019/10/13515522913044.jpg[/IMG]
عشان عيونكم
اللهم صل وسلم وبارك علي سيدنا محمد
