النهاردة بقدم للمبتدئات طريقة للبسلة والجزر باللحمة البقري
من مطبخي وأنا مطبقاها في حلة الضغط واللى معندهاش برضه مفيش مشكلة بس حلة الضغط بتوفر معايا وقت كتيييييييير قوي
نشوف المقادير حبيباتي
3/4 بسلة جزر طبعا بتعملى الكمية على حسب عدد عيلتك وكمان أنا بعمل الأكلة ليومين
3/4 طماطم مضروبة ومصفاه
2 بصلة كبيرة مقطعة شرائح
5 فصوص ثوم كبيرة مفرومة
1 كجم لحمة بقري
1 ملعقة كبيرة ملح خلى بالك البسلة بتبقي مسكرة يعني لازم تظبطي ملحها كويس
1 ملعقة صغيرة فلفل أسود
نشوق الطريقة بالصور
دى اللحمة والطماطم
وضعت اللحمة بعد غسلها جيدا في الحلة مع الطماطم والملح والفلفل الأسود
حاقفل حلة الضغط عليها وأظبط ساعتي علي نصف ساعة بالضبط
دي البسلة والجزر طبعا ببقي مخزناهم عندى بالديب فريزر جرد بتقطعي الجزر وتفرطى البسلة وتغسليها وتشيليها بالفريزر
ومعاها البصل والثوم
بعد مرور النصف ساعة افتحي حلة الضغط وضعي البسلة وظبطي المياه وبتبقي بالشكل ده وشوفي الملح بتاعك مظبوط ولا لأه
اقفلي عليها واظبطي ساعتك على 10 دقائق بالضبط وكده أكلتك بقت جاهزة
ايه رأيكم تمام مش كده تسلميلي ياحلتى الغالية أنا مسمياها لهلوبة على فكرة
وده طبق البسلة والجزر باللحمة البقري في النهاية
سهل وخفيف مش كده
الطريقة دي نئ × نئ
يعني لا شوحتى حاجة ولا قليتي حاجة
قدميه مع برام الرز المتين
طاب من العدولات اللي حتقولى طاب انتى ربنا بيحبك وجبتي حلة الضغط
طاب أنا ماعنديش أعمل ايه؟
ولا حاجة بسيطة جدا
حتسوى اللحمة 3/4 سوا وبعدين حتطلعيها وتحطى عليها الطماطم والبسلة والجزر والبصل والثوم والملح والفلفل وملعقة السمن وتظبطي مايتها وتسيبيها لحد ماتستوى وبس
أما لو عندك لحمة عجالى حطيها كلها مع بعض وحتستوي علطول طبعا
وممكن كمان تحطيها في البرام في الفرن بنفس الطريقة وحابقي اعملهالكم برضه ان شاء الله
يارب يكون شرحي وافى وأى استفسار تحت أمركم حبيباتى العدولات
