الرز الابيض بخلطة البصل والزبيب
مكونات الرز : 2 كوبين رز (او حسب عدد الاشخاص) , حبتين فلفل حار , بهارات صحيحة( عودين دارسين , نص ملعقة صغيرة كمون حب, 4 حبات هيل , حبتين مسمار , ورقة غار )
حبتين بصل مقطع بالطول , ونص كوب زبيب منقوع في مويه دافية, وشوية زعفران (انا استخدم الزعفران المطحون )
الطريقة : نحط زيت في تاوة ونحمر البصل الين يصير ذهبي وبعدين نضيف الزبيب الين ينتفخ نحط عليه الزعفران ونقلبه ونقفل عليه
في حلة نحط زيت ونمعاه الفلفل والكوم والدارسين والهيل والمسمار والغار ونحمسهم شوي وبعدين نحط الرز ونقلبه مع البهارات والزيت كويس ونضيف الملح والمويه الحارة ونتركه على نار خفيفة ….قبل ما يستوي الرز نشيل نصه في غطا الحلة او في طبق ونحط كشنة البصل في النص ونرجع الرز اللي في الطبق في الحلة ونغطيه الين يستوي والف صحة وعافية
سمك الزبيدي مع الرز
المكونات : سمك زبيدي منظف
رز حسب الكمية انا هنا سويت كوب رز نغسله وننقعه بمويه حارة ونرش عليه ملح
حبتين بصل مقطعه حلقات
حبة صغيرة فلفل بارد اخضر
حبة فلفل اخضر حار
3 حبات ثوم مقطعة نصفين
حبتين لومي اسود
عود دراسين كبير
عودين مسمار , 3 حبات هيل . بهارات سمك . ربع ملعقة صغيرة كاري . فلفل اسود حب , رشة كمون , رشة كزبرة مطحونة . كركم . زعفران بودرة اذا متوفر احسن من الزعفران الشعر
الطريقة : ننظف السمك بالليمون والبهارات طبعا نطلع الاحشاء ونقص الزعانف والذيل , وبعدين نغسلها بالمويه .ناخذ تقريبا نص بصلة من البصل المقطع ونقطعه صغير ونحط عليه حبه لومي مطحونه مع شوية بهارات سمك (انا سويت سمكة وحدة كبيرة يعني الكمية تكفي حق سمكة) وملح ونحشيهم بالسمكه ونخيطها او نثبتها باعواد اسنان ونقليها بزيت حار وغزير انا حطيت مع الزيت شوية زعفران مطحون عشان يديها لون اصفر
الحين نجيب حلة ونحط فيها زيت وعود الدارسين والهيل والمسمار وفلفل اسود حب وحبة اللومي الثانية (انا ادقها شوي عشان تطلع نكتها )واحمسهم بالزيت واحط باقي البصل والفلفل البارد والحار والثوم واقليهم بالزيت واحط معاهم شوية كركم وبهارات السمك وكاري وكمون وكزبرة واقلبهم الين تبدا الكشنه تتحمر ارفع نصها في طبق واحط السمكة عليهم واحط كوب مويه حاره …اتركهم دقيقتين او ثلاثة وبعدين احط الرز وازود مويه حسب حاجة الرز …لمن تبدا المويه تنشف احط باقي الكشنة حقت البصل والفلفل بين الرز ورشة زعفران واقفل عليهم على نار خفيفة مرة عشان يتخدر الين يستوي الرز وتنشف المويه والف صحة وعافية
برياني الدجاج
المكونات :دجاجه مقطعة او حسب عدد الاشخاص .كوبين رز او حسب عدد الاشخاص . حبتين بطاطس مقطعة مكعبات . كوب ونص بازيليا وجزر مسلوق, حبيتين طماطم مقشرة ومقطعه . بصله كبيرة مقطعة طويل , 4 فصوص ثوم مهروس , فلفل حار اخضر , 6 ملاعق زبادي . ملعقتين صلصة طماطم , 7 اوراق نعناع مقطعة خشن , ملعقة كبيرة بهارات برياني , ملعقة صغيرة كاري , رشة فلفل اسود , عودين دارسين . 4 حبات هيل ونص ملعقة هيل مطحون . زعفران منقوع بمويه ورد . ملعقة صغيرة زنجبيل
الطريقة : نسلق الدجاج كالعاده بس نضيف كاري ودارسين وهيل ومسمار ولمن يستوي نصفي الدجاج من المويه ونشيل المويه ونتركها على جنب , اول شي نجيب تاوة ونحط فيها زيت ونقلي البطاطس فيها ولا نكثر زيت عشان راح نستخدم نفس التاوة وبس تستوي البطاطس نحط البازيليا الجزر ونسيبهم يستووا شوي وبعدين نضيف الطماطم وصلصة الطماطم ونحركهم شوي شوي ونضيف البهارات (بهارات البرياني , الفلفل الاسود , ملح , الكاري , الهيل المطحون) ونغطيهم ونتركهم على نار خفيفة . وفي تاوة ثانية نحط زيت ونحط عليه الزنجبيل ونحمس الزنجبيل شوي ونحط عليه البصل الين يبدأ البصل يتحمر نضيف الثوم ونسيبهم يتحمروا شوي وبعدين نقفل عليهم ونضيفهم على الكشنه حقت البطاطس ونقلبهم مع بعض بعدين نضيف عليهم الزبادي والنعناع المفروم ونقلبهم ونسيبهم لمده دقيقة ونقفل عليهم ..الحين نجيب قدر فيه مويه حارة ونحطه على النار ونضيف عليه حبات الهيل والدارسين وشوي زيت وملح ولمن تغلي المويه نضيف الرز طبعا نكون مغسلينه من غير نقع وقبل ما يستوي بشوي نقفل النار ونصفيه من المويه ونبدأ نسوي الطبقات حقت البرياني ,,, اول شي نجيب قدر ونحط فيه طبقة رز خفيفة ومعاها شوي زعفران والطبقة الثانية نحط شوي من كشنة الخضار ونرجع نحط طبقة رز عليها شوي زعفران (الزعفران نحركه تحريك خفيف عشان لا يتلون كل الرز ) ونرجع نحط طبقة من الكشنه الين تغلق الكمية بس اخر طبقة لازم تكون رز ونحط عليها باقي موية الزعفران ونجيب مويه الدجاج مقدار كوب او اكثر حسب حاجة الرز ونحطها على الرز ونغطيه بقصدير ونشغل لنار عليه بس تكون نار خفيفة مرة عشان يتخدر الرز على راحته والف صحة وعافية
بالنسبة للدجاج انا هنا شويته في الفرن وممكن نسوييه بطريقة مناسبة للبرياني زي هاذي الطريقة : نجيب علبه زبادي متوسطة ونخلط معاها 4 حبات ثوم مهروس وكاري وزيت ونحطهم على الدجاج ونحمرهم في الفرن وصحة وعافية
كتاب جداً جميل ومكون من 450 صفحة ويحتوي علي هذه الأقسام 
بالاضافه إلي قسم مهم جدا للمبتديات بالطبخ تعليم الأساسيات .. 
وبا لأضافه لقسم ثاني اسمه (( معجم المفردات )) فيه ترتيب أبجدي لمختلف مواد الطبخ من نباتات وحبوب ودهون .. الخ ويبين طريقة استعمال هذه المواد وشرح فائدتها ووقت استخدامها ..وكل طبخة تتكون من صفحتين . صفحة للمقادير وأخرى لطريقة ألطبخه ومع الصور طبعاً ..
-رشيدة العلوي
