الكرواسون المقلي
من كام يوم قلت أعمل كرواسون بس عايزة أعمل العجينة بتاعته مش اشتريها جاهزة ودى بصراحة أول تجربة ليا مع المعجنات
المهم لقيت البعض بيتكلم عن عجينة العشر دقايق
قلت ايه عجينة العشر دقايق دي ياتري؟
أتراى اسمها كده لان المرحلة الأولى منها بخمر بعشر دقايق وبعدين المرحلة التانية بتجهزيها وتشتغلي علطول بيها
المهم ماكدبتش خبر قلت لازم أنفذها فورا
جبت حاجتى وقلت أما أشوف حتخمر ازاى دى؟
نشوف مع بعض المقادير
المرحلة الأولى
2 كوب ماء دافئ لازم دافية عشان تخمر
2 كوب دقيق
ملعقة كبيرة خميرة فورية
1/2 ملعقة صغيرة ملح
فنجان قهوة سكر
2 ملعقة كبيرة لبن بودرة
بيضة
اعجنى المقادير مع بعض وتترك لتخمر 10 دقائق
ندخل عالمرحلة التانية ومقاديرها
3 كوب دقيق
1/2 كوب زبدة مذابة أو زيت نباتى
ضيفيهم واعجنيهم واستخدميها مباشرة
أكيد مش مصدقة
خليكي معايا وانتى تصدقي
افردى العجينة علي سطح مرشوش بالدقيق بشكل مستطيل وساويه بالسكين وبعدين قطعيها مثلثات متساوية
حطى قطع الشوكولاتة ولو عايزة تحطى جبنة براحتك طبعا
لفيها وسيبيها تخمر 1/2 ساعة تمام
أنا بقي عملت حاجة غير الفرن
قليتها في زيت ساخن ولما تطلعيها رشي سكر بودر وده اختياري طبعا
نشوف مع بعض الصور طبعا لانى ملخومة وأول مرة أعملها وكنت شاكة كتير انى مش حاطلعها مظبوطة ماصورتش بعض الخطوات بس مش كتير يعنى
نتابع مع بعض
زوووووووووووم للكرواسون
مش عايزة تريقة سامعين هههه
والله طلع جميل
ودى وحبى لكم
تسلمى يا احلى شيف
شكرا سنسن للتكريم
