التصنيف: من مطبخي

كوب الا ربع دقيق لاننا ها نكملة بالكاكاو .. كوب الا ربع سكر
6 بيضات .. فانيليا
2ملعقة كبيرة بيكنج بودر .. محسن كيك

بالمضرب الكهربائى نضرب البيض والسكر والفانيليا..

نضيف للدقيق ربع كوب كاكاو والبكينج بودر ومحسن الكيك وننزلهم على خليط البيض والسكربعد نخلهم بمنخل او مصفاة ضيقة جدا ..

وبملعقة خشبية نقلب بهدوء حتى يمتزج الكل ..

وفى صينية مناسبة نصب الخليط ويجب ان يصل لمنتصف الصينية ودة احد الاخطاء اللى وقعت فيها ان الخليط كان اقل من منتصف الصينية فعلوها كان غير مناسب واضطريت اعمل واحدة تانية ..

وندخلها الفرن الساخن وطبعا ما نحاولش نفتح عليها قبل 20 دقيقة ..
فى الوقت دة ها نحضر الشكولاتة الخام والكريمة …

ها نجيب شيكولاتة خام من نوع كويس ودة خطأى الثانى انى جبتها كورونا واكتشفت انها مسكرة كتيير ..

المهم بكسرها لقطع ونعملها حمام مائى يعنى نضعها باناء صغير نضعة داخل اناء اكبر بة ماء على النار حتى تسيح وتبقى بالقوام المطلوب ..

دلوقتى ها نعمل الكريمة .. ها نحتاج 2 كيس كريم شانتية و2 فنجان لبن مثلج و6 ملاعق كاكاو او كيس نسكويك كبير ..

نضربهم كويس بالمضرب ..

بالنسبة للكيكة لما تنضج نطفى عليها النار ونسيبها نصف ساعة فى الفرن ونطلعها على شبكة ونسيبها 3 او 4 ساعات ترتاح ولو كانت بالعلو المناسب بنقسمها نصفين ..
انا زى ما قلتلكم عملت اتنين ..

بنجيب النصف الاول ونغطية بالكريمة ونضع النصف التانى ونغطية هو والجوانب بالكريمة ..

ونصب فوقها الشيكولاتة المذابة ..

ونضع باقى الكريمة فى كيس حلوانى ونزينها زى ما احنا عايزين
انا كمان غلفت صور احمد وشهد وحطيتها عليها ..

وادى اصحاب عيد الميلاد بنفسهم وموش قادرة اقولكم كانوا هما واخواتهم فرحانين اد اية بالتورتة اكتر بكتيير من اللى كنا بنشتريها بمبلغ وقدرة ..

وادى التورتة بعد ما قطعت جزء منها ..

بتمنى اكون افدتكم فى تجربتى المتواضعة لعمل تورتة شيكولاتة بالبيت .